تعلیم ہی قوموں کی ترقی کی ضامن ہے، بچوں کی حوصلہ افزائی وقت کی اہم ضرورت: مقررین کا خطاب
(رپورٹ: نامہ نگار)
مظفرنگر 30 مارچ: تعلیم کسی بھی معاشرے کی ریڑھ کی ہڈی ہوتی ہے اور اساتذہ و والدین کی مشترکہ محنت سے ہی نو نہالانِ وطن کا مستقبل تابناک بنایا جا سکتا ہے۔ ان خیالات کا اظہار یونیورسل پبلک جونیئر ہائی اسکول مملانہ روڈ مظفر نگر کے ‘سالانہ تعلیمی نتائج’ (Annual Result Day) کے پرمسرت موقع پر منعقدہ ایک خصوصی تقریب کے دوران کیا گیا
اس پُروقار تقریب کا انعقاد اسکول انتظامیہ کی جانب سے کیا گیا، جس میں محترم ڈاکٹر جمیل احمد صاحب کی پُرخلوص دعوت پر علاقے کی مقتدر اور معروف سیاسی و سماجی شخصیات نے شرکت کر کے تقریب کی رونق کو دوبالا کیا۔ مہمانانِ خصوصی میں سماجوادی پارٹی کے قومی سکریٹری راکیش شرما جی، ‘پیغامِ انسانیت’ کے صدر حاجی آصف راہی صاحب اور ممتاز شاعر و ہفت روزہ ‘تنویرِ ادب’ کے ایڈیٹر ڈاکٹر تنویر گوہر شامل تھے۔
تقریب کا آغاز روایتی جوش و خروش کے ساتھ ہوا، جس کے بعد کامیاب طلبہ کے نتائج کا اعلان کیا گیا۔ اس موقع پر مہمانوں نے اپنے ہاتھوں سے پوزیشن حاصل کرنے والے بچوں میں انعامات اور اسناد تقسیم کیں۔ راکیش شرما جی اور حاجی آصف راہی صاحب نے بچوں کی تعلیمی کارکردگی کو سراہتے ہوئے کہا کہ آج کے بچے کل کے معمار ہیں، ان کی صحیح تربیت ہی ملک و قوم کی بقا ہے۔ ڈاکٹر تنویر گوہر نے اپنے مخصوص انداز میں بچوں کی حوصلہ افزائی کی اور ان کے روشن مستقبل کے لیے نیک تمناؤں کا اظہار کیا
تقریب میں حاجی شکیل احمد، ماسٹر رمیش چندر شرما، ڈاکٹر شمیم ملک، جناب فیاض ملک، جناب ادریس ملک اور جناب نفیس ممبر صاحب کی باوقار موجودگی نے تقریب کے وقار میں اضافہ کیا۔ تمام معزز مہمانوں نے اسکول کی تعلیمی خدمات کو سراہا اور ڈاکٹر جمیل احمد کی کاوشوں کی بھرپور ستائش کی۔
آخر میں اسکول انتظامیہ اور ڈاکٹر جمیل احمد صاحب نے تمام مہمانوں، والدین اور طلبہ کا شکریہ ادا کیا۔ تقریب کا اختتام بچوں کے لیے ڈھیروں دعاؤں اور اس عزم کے ساتھ ہوا کہ اسکول کی جانب سے معیاری تعلیم اور ہم نصابی سرگرمیوں کا یہ سلسلہ مستقبل میں بھی اسی جذبے کے ساتھ جاری رہے گا۔
